शनिबार, पौष २०, २०८१
बाँदुकमा खेलमैदान र बास्केटबलको फाइवर बोर्डको उद्घाटन
म्याग्दी । म्याग्दीको रघुगंगा गाउँपालिका वडा नम्वर १ बाँदुकको श्रीकृष्ण आधारभूत विद्यालय परिसरमा पुननिर्माण भएको वास्केटबल खेलमैदान र फाइवर बोर्डको शुक्रबार उद्घाटन गरिएको छ ।
गण्डकी प्रदेश सरकारको रु दश लाख अनुदान र स्थानीयबासीको श्रमदानमा गत आर्थिक वर्ष २०७९÷८० मा खेलमैदान ढलान गरिएको थियो । पुननिर्माण भएको खेलमैदानको गण्डकी प्रदेशका सांसद हरिबहादुर भण्डारीले दियोमा बत्ति तथा पुर्व सांसद बिनोद केसीले शिलालेख अनावरण गरेर उद्घाटन गर्नुभयो ।
बास्केटबलको दुई वटा फाइवर बोर्ड स्थापना गर्न बाँदुक घर भई हाल सिंगापुर प्रहरीमा कार्यरत मिथुन शेरपुञ्जाको नेतृत्वमा रु चार लाख २६ हजार चन्दा संकलन भएको थियो ।
फाइबर बोर्डको प्रतिनिधिसभा सदस्य खमबहादुर गर्बुजा (खम्बिर) ले शिलालेख अनावरण र चन्दा संकलनमा अगुवाई गरेका शेरपुञ्जाले रिवन काटेर उद्घाटन गर्नुभएको थियो । बाँदुकमा यसअघि निर्माण भएको खेलमैदान पहिरोले पुरिएको र विद्यालय परिसरको खेलमैदान जिर्ण भएपछि ढलान गर्न स्थानीयबासीको अनुरोधमा पुर्व सांसद केसीको सिफारिसमा गत आर्थिक वर्षमा बजेट बिनियोजन भएको थियो ।
अहिले ढलान भएको खेलमैदानको लम्बाई र चौडाई मापदण्ड नपुग्ने तथा दर्शक बसेर खेल अवलोकन गर्ने प्याराफिट बनाउन आवश्यक रहेको उपभोक्ता समितिका अध्यक्ष चुकबहादुर शेरपुञ्जाले बताउनुभयो ।
Related posts
