आईतबार, चैत्र २, २०८१
जालझेल आवश्यक छैन, जेठ २ मा फर्किएर अगाडि बढौंः शाक्य
नेकपा एमालेकी उपाध्यक्ष एवं बागमती प्रदेशकी मुख्यमन्त्री अष्टलक्ष्मी शाक्यले अन्तरपार्टी निर्देशनलाई अक्षरशः कार्यान्वयन गर्न आग्रह गर्नु भएको छ ।
एमाले काठमाडौंले बिहीबार गरेको जिल्लास्तरीय विस्तारित प्रशिक्षण कार्यक्रममा उपाध्यक्ष शाक्यले भन्नुभयो, ‘त्यसमा जालझेल आवश्यक छैन । २०७५ जेठ २ मा जो आउँछ, उसैलाई मानेर अगाडि बढौं ।’ विभाजनले कसैको हित नगर्ने भन्दै उहाँले सुदृढ एमाले बनाउन मन फराकिलो बनाउनुपर्ने बताउनुभयो ।
नेतृ शाक्यले अब प्यानलगत चुनाव गर्न नहुने पनि बताउनुभयो । नवौं महाधिवेशनमा दुईवटा प्यानल बनाएर लडेको र एउटा जित्दा अर्कोले हारेपछि गुटबन्दी भएको शाक्यले बताउनुभयो ।
पार्टीमा पछिल्लो समय विचारमा पनि विचलन आएको उहाँको भनाई थियो । ‘खासगरी नवौं महाधिवेशनपछि व्यवस्थित वैचारिक प्रशिक्षण गर्न सकेनौं । जब प्रशिक्षण र वैचारिक छलफलको अभाव भयो, कमिटी अराजकतातिर गयो । विचार शून्य भएपछि हामी गुटबन्दीको शिकार भयौं,’ शाक्यले भन्नुभयो, ‘अब लुकाएर हुँदैन, हामीले यसको निर्मम समीक्षा गर्नैपर्छ । त्यो आँट नेतृत्व तहले गर्नैपर्छ ।’
अनलाइन खबर बाट
Related posts
